ᐱᐊᕋᖅᐱᑦ ᑭᒍᑎᖏᑦ ᐱᒻᒪᕆᐅᒻᒪᑕ ᑕᒧᐊᔾᔪᑎᒋᓲᕆᓪᓗᓂᒋᑦ ᐊᒻᒪᓗ ᐅᖃᓪᓚᑎᓪᓗᒍ ᐊᑑᑎᖃᖅᑐᑎᑦ. ᐱᐊᕋᖅᐱᑦ ᖃᓂᖓ ᓴᓗᒪᑎᖃᑦᑕᕐᓗᒍ ᑭᒍᓯᕆᓕᖁᓇᒍ. ᑭᒍᑎᕐᓗᓕᖅᑐᓂ ᐱᐅᙱᑐᓪᓚᕆᐅᒻᒪᑦ ᖃᖓᑐᐃᓐᓇᒃᑯᑦ ᐅᑭᐅᖃᕋᓗᐊᕈᑎᑦ ᖃᑦᑎᓂᑦ ᑭᒍᑎᕐᓗᓕᕈᓐᓇᖅᑐᑎᑦ ᐊᒻᒪᓗ ᐋᓐᓂᐊᓕᕈᓐᓇᖅᑐᑎᑦ, ᐃᒻᒪᒃᓯᒪᓕᕐᓗᑎᑦ, ᓂᕆᑦᑎᐊᕈᓐᓇᐃᓕᔾᔪᑕᐅᔪᓐᓇᖅᑐᑎᑦ, ᐊᒻᒪᓗ/ᐅᕝᕙᓘᓐᓃᑦ ᐅᖃᓪᓚᒍᓐᓇᑦᑎᐊᕈᓐᓃᕐᓗᑎᑦ.
ᑭᓱᑦ ᑭᒍᑎᕐᓗᓕᕈᑕᐅᓲᖑᒻᒪᑕ ᐱᐊᕋᕐᓂᑦ?
ᑭᒃᑯᓕᒫᑦ ᖁᐱᕐᕈᖃᕐᒪᑕ ᑕᑯᒃᓴᐅᙱᑦᑐᓂᑦ ᖃᓂᖏᓐᓂᑦ. ᑖᒃᑯᐊ ᖁᐱᕐᕈᑦ ᓱᑲᕐᒧᑦ ᓂᕿᓂᑦ ᐃᒥᖅᑕᐅᕙᑦᑐᓂᓪᓗ ᓱᕈᖅᑎᑦᑎᓲᖑᓪᓗᑎᑦ. ᖃᐅᑕᒫᑦ ᑭᒍᑎᓯᐅᖃᑦᑕᙱᒐᐃᒻᒪᑕ, ᓱᕈᖅᐸᓪᓕᐊᓲᖑᒻᒪᑕ ᑭᒍᑏᑦ, ᐊᒻᒪᓗ ᑭᒍᑎᕐᓗᓕᕈᑕᐅᕙᑦᑐᑎᑦ.
ᐃᖅᑲᐅᒪᒋᑦ....
- ᓴᓗᒪᑎᖃᑦᑕᕐᓗᒋᑦ ᐱᐊᕋᖅᐱᑦ ᐃᒃᑭᖏᑦ ᖃᐳᖅᑎᕈᕐᒧᑦ, ᐊᒻᒪᓗ ᑭᒍᑎᓯᐅᖃᑦᑕᕐᓗᒍ ᐊᕿᑦᑐᒧᑦ ᑭᒍᑎᓯᐅᕈᑎᒧᑦ ᖃᐅᑕᒫᑦ. ᓯᓂᒋᐊᖅᑐᓚᐅᙱᓐᓂᖓᓂ ᕿᑐᕐᖓᐃᑦ ᑭᖑᓪᓕᖅᐹᖅ ᐅᖁᒻᒥᐊᖅᓯᒪᔭᒥᓂᕆᒋᐊᓕᖓ ᑭᒍᑎᓯᐅᕈᑎ ᐅᕝᕙᓘᓐᓃᑦ ᓂᕈᒥᑦᑐᖅ ᖃᐳᖅᑎᕈᑎ.
- ᐃᕕᐊᖏᒃᑯᑦ ᐊᒫᒪᑦᑎᑦᑎᓲᑦ ᖃᓂᕐᒥᒃ ᖃᓄᐃᙱᑎᑦᑎᒍᑕᐅᓲᖅ ᐊᒻᒪᓗ ᐊᓪᓕᕈᕐᒥᒃ ᐱᕈᖅᐸᓪᓕᐊᑦᑎᑦᑎᐊᓲᖑᒋᓪᓗᓂ.
- ᐃᓅᕋᑖᖅᑐᒥᓂᐅᑎᓪᓗᒋᑦ ᑎᑭᑦᑐᒍ ᑕᖅᑭᖃᓕᖅᑎᓪᓗᒋᑦ ᐱᖓᓲᔪᖅᑐᓂᑦ, ᐱᐊᕋᐃᑦ ᐃᕕᐊᖏᕐᒥ ᐃᒻᒧᖕᒥᒃ ᐅᕝᕙᓘᓐᓃᑦ ᓴᕕᕋᔭᒃᓴᓕᖅᓯᒪᔪᖅ ᐃᒻᒧᒃ ᓂᕿᑐᐊᕆᔭᕆᐊᓕᖓ ᐊᒻᒪᓗ ᐃᒥᖅᑕᑐᐊᕆᖃᑦᑕᕆᐊᓕᖓ ᓈᒻᒪᑦᑑᒐᒥ.
- ᐃᕕᐊᖏᕐᒥᒃ ᐃᒻᒧᒃ ᐊᒻᒪᓗ ᓴᕕᕋᔭᒃᓴᓕᖅᓯᒪᔪᖅ ᐃᒻᒧᒃ ᑖᒃᑯᐊᑐᐊᒃ ᐱᐊᕋᖅᐱᑦ ᐊᒫᒪᐅᑎᖓᓃᒋᐊᓖᒃ.
- ᐱᒋᐊᖅᑐᒍ ᐱᖓᓲᔪᖅᑐᓂᑦ ᑕᖅᑭᖃᓕᖅᑎᓪᓗᒍ, ᐊᑐᖃᑦᑕᕐᓗᑎᑦ ᒪᑐᖃᙱᑦᑐᒥᒃ ᐃᒥᐅᑎᒥᒃ ᐃᒥᕐᒥᒃ ᐱᑎᒐᓱᐊᕐᓗᒍ ᐱᐊᕋᐃᑦ ᐃᕕᐊᖏᑉ ᐃᒻᒧᒋᙱᑕᖓᓂᑦ. ᓯᕗᓪᓕᖅᐹᒥ, ᐱᐊᕋᐃᑦ ᐃᑲᔪᖅᑕᐅᔭᕆᐊᖃᕋᔭᖅᑐᖅ ᐃᒥᕐᓗᓂ ᐃᒥᐅᑎᒧᑦ.
- ᓰᕐᓇᖅᑐᑦ ᐃᒦᑦ ᓲᕐᓗᒃ ᐃᒥᒐᑦ, ᐃᒥᒐᒃᓴᑦ ᐊᒻᒪᓗ ᓱᑲᓕᖅᓯᒪᔪᑦ ᑏ ᐊᒫᒪᐅᑎᒨᖅᑕᐅᔭᕆᐊᖃᙱᓪᓚᕆᑦᑐᑦ.
- ᐱᐊᕋᐃᑦ ᐊᒫᒪᐅᓯᔭᕐᓗᓂ ᓯᓂᒋᐊᖃᙱᓪᓚᕆᑦᑐᖅ.
- ᐃᔾᔪᐊᖅᑕᐅᔪᒥᓇᖅᑎᒋᑦ ᐊᑐᖃᑦᑕᕐᓗᒍ ᑕᒪᓐᓇ! ᓇᒻᒥᓂᖅ ᖃᓃᑦ ᓴᓗᒪᑎᖃᑦᑕᕐᓗᒍ ᖃᓄᐃᑦᑕᐃᓕᑎᓪᓗᒍᓗ ᑭᒍᑎᓯᐅᖃᑦᑕᕐᓗᑎ ᑯᒃᑭᓕᑏᔭᖃᑦᑕᕐᓗᑎᓪᓗ. ᑕᐃᒪᓐᓇᐃᖃᑦᑕᕈᕕᑦ ᖁᐱᕐᕈᑦ ᐊᒥᓱᕈᖅᑕᐃᓕᒐᔭᖅᑐᑦ ᑭᒍᓯᕆᔾᔪᑕᐅᓲᑦ ᐱᐊᕋᕐᓄᑦ. ᑭᒍᓯᕆᔾᔪᑕᐅᓲᑦ ᖁᐱᕐᕈᐃᑦ ᐊᐃᑦᑑᑕᐅᒍᓐᓇᖅᑐᑦ ᐊᖓᔪᖅᑳᕆᔭᐅᔪᒥᒃ ᕿᑐᕐᖓᒥᓄᑦ.