ᑭᒍᑎᓄᑦ ᓴᙱᓕᖅᓴᐅᑏᑦ

ᑭᒍᑎᓄᑦ ᓴᙱᓕᖅᓴᐅᑏᑦ ᓇᓂᔭᐅᔪᓐᓇᓲᑦ ᐃᑉᔪᓂ, ᐃᒥᕐᒥᒃ (ᐃᒥᑦᑎᐊᕙᖕᒥᒃ ᐊᒻᒪᓗ ᑕᕆᐅᕐᒥ) ᐊᒻᒪᓗ ᐊᔾᔨᒌᙱᑦᑐᓂᑦ ᓂᕿᓂ.  ᑕᒪᓐᓇ ᑐᑭᓕᒃ ᓂᕆᓲᖏᓐᓇᐅᒐᑦᑕ ᐃᓚᖏᓐᓂᑦ ᑭᒍᑎᓄᑦ ᓴᙱᓕᖅᓴᐅᑎᓂᑦ ᖃᐅᑕᒫᑦ.  ᑭᒍᑎᓄᑦ ᓴᙱᓕᖅᓴᐅᑏᑦ ᓇᓂᔭᐅᒍᓐᓇᕐᒥᔪᑦ ᐊᒥᓱᒻᒪᕆᖕᓂᒃ ᐊᔾᔨᒌᙱᑦᑐᓂᑦ ᖃᐳᐊᕈᑎᓂᑦ.  ᑭᒍᑎᓕᕆᔩᑦ ᐊᑐᕈᓐᓇᕐᒥᔪᖅ ᑭᒍᑎᓄᑦ ᓴᙱᓕᖅᓴᐅᑎᓂᑦ, ᓲᕐᓗᒃ: ᑭᒍᑎᓄᑦ ᓴᙱᓕᖅᓴᐅᑏᑦ ᐃᕐᕈᖅᑑᑎᓂᑦ, ᓇᔭᐅᔭᐅᔮᖅᑐᓂᑦ, ᐊᒻᒪᓗ ᐃᓚᐅᑉ ᑐᙵᕕᖓ ᐊᒥᐊᒃᓴᓂᑦ. 

ᑭᒍᑎᓄᑦ ᓴᙱᓕᖅᓴᐅᑏᑦ ᓇᑭᙶᕐᓂᖏᑦ:

  • ᐃᒥᖅ
    • ᐱᖓᓱᑐᐊᑦ ᓄᓇᓖᑦ ᓄᓇᕗᒻᒥ ᑭᒍᑎᓄᑦ ᓴᙱᓕᖅᓴᐅᑎᓂᑦ ᐊᑐᓲᑦ ᐃᒥᕐᒥ: ᐃᖃᓗᐃᑦ, ᑲᖏᖅᖠᓂᖅ ᐊᒻᒪᓗ ᐊᕐᕕᐊᑦ.  ᐃᓚᖏᑦ ᐃᒦᑦ ᐃᒥᐅᑎᓃᓲᑦ ᓂᐅᕕᐊᕆᔭᐅᓪᓗᑎᑦ ᑭᒍᑎᓄᑦ ᓴᙱᓕᖅᓴᐅᑎᖃᓲᖑᒻᒥᔪᑦ.
  • ᑭᒍᑎᓯᐅᕐᓗᓂ ᖃᐳᐊᕈᑏᑦ
    • ᐱᐅᓛᖑᖁᓪᓗᒍ ᐊᑦᑐᐃᓂᖃᕐᓂᖓ, ᑭᒍᑎᓄᑦ ᓴᙱᓕᖅᓴᐅᑏᑦ ᖃᐳᐊᕈᑏᑦ ᐊᑐᖅᑕᐅᔭᕆᐊᓖᑦ ᒪᕐᕈᐊᖅᑎᕐᓗᑎᑦ ᐅᓪᓗᖅ ᐊᑕᐅᓯᕐᒥᒃ ᑭᒍᑎᓯᐅᖅᑐᖃᕐᓗᓂ.  ᓱᕈᓰᑦ ᒥᑭᓂᖅᓴᓂᑦ ᐊᑐᕆᐊᓖᑦ ᐃᓐᓇᐃᑦ ᐊᖏᓂᖅᓴᓂ ᐊᑐᕋᓗᐊᖅᑎᓪᓗᒋᑦ.  ᓱᕈᓰᑦ ᐊᑐᕆᐊᓖᑦ ᑭᒍᑎᓄᑦ ᓴᙱᓕᖅᓴᐅᑎᓂᑦ ᑭᓯᐊᓂ ᐅᕆᐊᕈᓐᓇᕈᑎᑦ ᖃᐳᐊᕈᑎᒥᒃ − ᐱᒻᒪᕆᐅᒻᒪᑦ ᐄᔭᐅᙱᓪᓗᓂ ᑭᒍᑎᓄᑦ ᓴᙱᓕᖅᓴᐅᑏᑦ ᖃᐳᐊᕈᑏᑦ.  ᓱᕈᓰᑦ ᑭᒍᑎᓯᐅᖃᑦᑕᕆᐊᓖᑦ ᑭᓯᐊᓂ ᐅᐊᑦᑎᔭᐅᓗᑎᑦ ᐃᓐᓇᕐᒧᑦ.
  • ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᖅ ᐊᑐᖅᑕᐅᓗᓂ
  • ᑭᒍᑎᓄᑦ ᓴᙱᓕᖅᓴᐅᑎ ᐃᕐᕈᖅᑐᕐᓗᓂ ᐅᖁᒻᒥᐊᕐᓗᒍ
    • ᑖᓐᓇ ᐃᒪᖅ ᐃᓚᓕᐅᑎᓯᒪᔪᖃᖅᑐᓂ ᑕᕆᐅᕐᒦᑦᑐᓂᑦ ᓇᓂᔭᐅᓲᓂᑦ ᐱᖃᓯᐅᑎᓪᓗᒍ ᑭᒍᑎᓄᑦ ᓴᙱᓕᖅᓴᐅᑏᑦ − ᐊᑕᐅᓯᕐᒥᒃ ᒥᓂᔅᓯᒻᒥᒃ ᐊᑯᓂᐅᑎᒋᔪᖅ ᐅᖁᒻᒥᐊᕐᓗᒍ ᐃᕐᕈᖅᑐᕆᐊᓕᒃ ᑖᓐᓇ ᐊᑐᖅᑕᐅᓪᓗᓂ.  ᑭᒍᑎᓄᑦ ᓴᙱᓕᖅᓴᐅᑏᑦ ᐅᖁᒻᒥᐊᕐᓗᒋᑦ ᐃᕐᕈᖅᓲᑏᑦ ᐊᑐᖅᑕᐅᖁᔭᐅᙱᑦᑐᑦ ᓱᕈᓯᕐᓄᑦ ᐅᑭᐅᓖᑦ ᐱᖓᓲᔪᖅᑐᓂᑦ ᑐᖔᓂ.
  • ᑭᒍᑎᓄᑦ ᓴᙱᓕᖅᓴᐅᑏᑦ ᓇᔭᐅᔭᐅᔮᖅᑐᑦ/ᖃᐳᐊᑦ
    • ᑭᒍᑎᓕᕆᔨᒧᑦ ᑕᒪᒃᑯᐊ ᑲᒪᒋᔭᐅᓲᑦ ᐱᖓᓲᔪᖅᑐᑦ ᑕᖅᑮᑦ ᐊᓂᒍᕋᐃᒻᒪᑕ.  ᓇᔭᐅᔭᐅᔮᖅᑐᑦ ᐅᕝᕙᓘᓐᓃᑦ ᖃᐳᐊᑦ ᖃᐳᐊᓄᑦ ᐃᓕᔭᐅᓲᑦ ᓵᕋᓛᕐᓄᑦ ᐊᒻᒪᓗ ᐅᖁᒻᒥᐊᖅᑕᐅᓪᓗᑎᑦ ᑎᓴᒪᑦ ᒥᓂᔅᓯ ᐊᑯᓂᐅᑎᒋᔪᖅ. 
  • ᑭᒍᑎᓄᑦ ᓴᙱᓕᖅᓴᐅᑏᑦ ᐄᔭᐅᓲᑦ
    • ᑖᒃᑯᐊ ᐃᓚᓕᐅᑎᓯᒪᔪᑦ ᒥᑭᔪᒻᒪᕆᖕᒥᒃ ᑭᒍᑎᓄᑦ ᓴᙱᓕᖅᓴᐅᑎᓂᑦ ᐊᒻᒪᓗ ᑯᑐᐊᕈᑎᓅᖅᓯᒪᓲᑦ ᐅᕝᕙᓘᓐᓃᑦ ᐄᔭᒐᐅᓪᓗᑎᑦ.  ᐊᑐᖅᑕᐅᔭᕆᐊᓖᑦ ᑭᒍᑎᓄᑦ ᓴᙱᓕᖅᓴᐅᑎᑕᖃᙱᒃᑯᓂ ᐃᒥᕐᒥᒃ ᐅᐊᑦᑎᔭᐅᓗᑎᓪᓗ ᑭᓯᐊᓂ ᐃᓐᓇᕐᒧᑦ.

ᑭᒍᑎᓄᑦ ᓴᙱᓕᖅᓴᐅᑏᑦ ᓴᐳᔾᔨᓲᖑᒻᒪᑕ ᑭᒍᑎᑉ ᑎᓯᓂᖅᐹᖓᓂ ᐆᑖᕐᓇᖅᑐᓂᑦ ᑭᒍᑎᒥᒃ ᓱᕈᐃᓲᖑᓪᓗᑎᑦ ᐆᑖᕐᓇᖅᑐᑦ.  ᐊᑐᖅᑕᐅᖃᑦᑕᕐᓗᑎᑦ ᑭᒍᑎᓄᑦ ᓴᙱᓕᖅᓴᐅᑎᓕᖕᓂᑦ (ᖃᐳᐊᕈᑎᓂᑦ ᐊᒻᒪᓗ ᐃᕐᕈᖅᑐᕈᑎᓂᑦ) ᐃᑲᔪᕋᔭᖅᑐᖅ ᑭᒍᓯᕆᓕᖅᑕᐃᓕᓗᑎᑦ.

ᑭᒍᑎᓄᑦ ᓴᙱᓕᖅᓴᐅᑏᑦ ᐊᑦᑕᓇᙱᓛᑦ?

ᐄ’!  ᐊᑐᖅᑕᐅᖃᑦᑕᕈᑎᑦ ᑭᒍᑎᓄᑦ ᓴᙱᓕᖅᓴᐅᑏᑦ ᑭᒍᑎᕐᓗᓕᖅᑎᑎᑦᑕᐃᓕᒍᑕᐅᓪᓗᑎᑦ ᖃᓄᐃᒋᔭᐅᓯᒪᙱᑦᑐᖅ 90 ᐅᖓᑖᓂ ᓄᓇᓕᕐᔪᐊᖑᔪᓂᑦ ᓄᓇᕐᔪᐊᕐᒥᓗ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑲᑐᔾᔨᖃᑎᒌᓄᑦ, ᐅᑯᐊᓗ ᓈᒻᒪᓴᖅᓯᒪᓪᓗᑎᑦ ᐊᑐᖅᑕᐅᒍᓐᓇᕐᓂᖏᓐᓂᑦ:

ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᖅ ᓴᐳᔾᔨᓲᖅ ᑭᒍᑎᓂᑦ

ᑭᓲᒻᒪᑦ ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᖅ?

ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᖅ ᓴᐳᔾᔨᒍᑎᐅᕗᖅ ᐊᒥᐊᖅᑕᐅᓲᖅ ᓱᕈᓯᑉ ᑭᒍᑎᖏᓐᓄᑦ ᑭᒍᑎᕐᓗᓕᕐᓂᐊᙱᒻᒪᑕ.  ᐊᒥᐊᖅᑕᐅᒍᓐᓇᕐᒥᔪᖅ ᑭᒍᑎᓄᑦ ᑭᒍᑎᕐᓗᒌᖅᑐᓄᑦ.  ᑭᒍᑎᓄᑦ ᓴᙱᓕᖅᓴᐅᑎ ᓱᒃᑲᐃᓪᓕᒋᐊᓕᖅᑎᑦᑎᒍᓐᓇᕐᒪᑦ ᐅᕝᕙᓘᓐᓃᑦ ᓄᖅᑲᑎᑦᑎᓗᓂ ᑭᒍᑎᕐᓗᑦᑐᓂᑦ ᐊᖏᓪᓕᓗᐊᕐᓂᐊᙱᒻᒪᑕ.  ᑕᒪᓐᓇ ᐊᑐᖅᑕᐅᓗᓂ ᐃᓇᖐᒋᐊᖃᙱᑦᑐᖅ ᑭᒍᓐᓂᐊᖅᑎᒥᒃ ᑕᑯᔭᖅᑐᕐᓗᓂ ᑭᒍᑎᓕᕆᔨᒧᑦ ᖃᐅᔨᓴᖅᑕᐅᓂᐊᕐᒪᑦ ᓱᕈᓰᑦ ᑭᒍᓐᓂᐊᖅᑕᐅᔭᕆᐊᖃᕋᔭᕐᒪᑦ.

ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᖅ ᐊᒥᐊᖅᑕᐅᒐᔭᖅᑐᖅ ᕿᑐᕐᖓᕕᑦ ᑭᒍᑎᖏᓐᓄᑦ ᐊᑕᐅᓯᐊᕐᓗᑎᑦ ᒪᕐᕈᐊᖅᑎᓘᓐᓃᑦ ᐊᕐᕌᒍᒥ.

ᖃᓄᖅ ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᖅ ᐊᑐᖅᑕᐅᓲᖑᕚ?

ᐱᓕᕆᔪᓐᓇᖅᑐᑦ ᐃᓕᓐᓂᐊᖅᓯᒪᓪᓗᑎᑦ ᐊᒥᐊᖅᓯᒍᓐᓇᖅᑐᑦ ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᒥᒃ ᐊᒥᐊᕆᓗᑎᑦ ᒥᑭᔪᒥᒃ ᐃᒋᒐᒃᓴᒥᒃ ᐊᑐᕐᓗᑎᑦ ᐊᒥᐊᕈᑎᒥᒃ ᐊᒻᒪᓗ ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᖅ ᕿᑐᕐᖓᕕᑦ ᑭᒍᑎᖏᑦ ᐊᒥᐊᖅᑕᐅᓗᑎᑦ.

ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᖅ ᐊᑐᖅᑕᐅᓚᐅᖅᑎᓪᓗᒍ ᑭᒍᑎᓄᑦ:

ᕿᑐᕐᖓᕕᑦ ᑭᒍᑎᖏᑦ ᖁᖅᓱᖅᑑᔮᕈᓐᓇᖅᑐᑦ ᐅᕝᕙᓘᓐᓃᑦ ᐊᒥᐊᖓ ᑕᑯᒃᓴᐅᓪᓗᓂ ᓯᕗᓪᓕᖅᐹᖓᓂ ᐅᓪᓗᖅ ᐊᒥᐊᖅᑕᐅᓚᐅᖅᑎᓪᓗᒍ.  ᑕᒪᓐᓇ ᐊᒥᐊᖅ ᐲᔭᖅᐸᓪᓕᐊᒐᔭᖅᑑᒐᓗᐊᖅ.  ᖃᓄᐃᙱᑦᑐᖅ ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᖅ ᑭᒍᑎᓂᑦ ᓂᐱᓐᓈᑎᑦᑎᓗᑎᑦ.  ᕿᓚᒥᐅᔪᖅ ᓂᐱᓐᓈᖅᑎᑦᑎᓲᖑᕗᑦ.

ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᒥᒃ ᐊᑐᖅᑐᑦ ᐃᑲᔫᑎᖃᓛᖑᖁᓪᓗᒍ, ᕿᑐᕐᖓᐃᑦ ᐃᒪᓐᓇᐃᓕᐅᖅᑐᒃᓴᐅᔪᖅ:

  • ᓂᕆᓗᓂ ᓂᕿᓂᒃ ᐊᕿᑦᑐᓂᒃ ᑭᖑᓪᓕᕐᒥ ᓂᕆᔭᕆᐊᖃᓕᕐᒥᒍᓂ.
  • ᑭᒍᑎᓯᐅᖅᑕᐃᓕᓗᓂ ᐅᕝᕙᓘᓐᓃᑦ ᓴᓗᒻᒪᓴᖅᑕᐃᓕᓗᓂᒋᑦ ᑭᒍᑎᖏᑦ ᑭᓯᐊᓂ ᖃᐅᓚᐅᖅᑎᓪᓗᒍ ᐅᓪᓛᒃᑯᑦ, ᑭᒍᑎᓄᑦ ᓴᙱᓕᖅᓴᐅᑎ ᐃᓚᐅᑉ ᑐᙵᕕᖓ ᐊᒥᐊᒃᓴᖅ ᖃᐅᒻᒥᒍᓂ ᐲᔭᕋᔭᖅᑐᖅ.
  • ᖃᖓᑐᐃᓐᓇᒃᑯᑦ ᐃᒥᖃᑦᑕᕐᓗᓂ ᐃᒥᑐᐃᓐᓇᕐᒥᒃ ᐃᒥᕈᓱᓕᕋᐃᑉᐸᑦ.