ᑭᓲᒻᒪᑦ ᖃᓂᒃᑯᑦ ᐃᒃᑭᓗᖕᓂᖅ??
ᐃᒃᑭᓗᑦᑕᐃᓕᔪᖃᕈᓐᓇᖅᐳᖅ! ᑕᐃᔭᐅᓲᖑᒻᒥᔪᑦ “ᐃᒃᑭᓗᑦᑐᖅ”, ᐊᒻᒪᓗ ᐃᒻᒪᒃᓯᒪᓪᓗᑎᑦ ᖃᓂᒃᑯᑦ ᐃᒃᑭᖏᑦ ᐊᒻᒪᓗ ᐊᓪᓕᕈᖏᑦ.
- ᐃᒃᑭᓗᒃᑐᖃᕈᓐᓇᖅᑐᖅ ᖃᑦᑎᐅᒐᓗᐊᕈᑎᑦ ᐅᑭᐅᖏᑦ ᐃᓄᐃᑦ
- ᐋᓐᓂᐊᓇᙱᒍᓐᓇᖅᑐᓂ ᐊᒻᒪᓗ ᖃᐅᔨᒐᒃᓴᐅᓗᐊᓲᖑᙱᑦᑐᓂ ᐱᕙᓪᓕᐊᓕᕋᓗᐊᖅᑎᓪᓗᒍ, ᑭᓯᐊᓂᓕ ᑭᒍᑎᓕᕆᔨᐅᔪᖅ ᖃᐅᔨᔪᓐᓇᖅᑐᓂ.
- ᑲᒪᒋᔭᐅᙱᒃᑯᓂ, ᑭᒍᑕᐃᖅᑐᖃᕈᓐᓇᖅᑐᖅ.
- ᖃᐅᔨᓵᖑᓯᒪᔪᑦ ᑕᑯᒃᓴᐅᑎᑦᑎᔪᑦ ᐃᒃᑭᕐᓗᓗᐊᖅᑐᑦ ᐆᒻᒪᑎᕐᓗᕈᓐᓇᕐᒪᑕ, ᓄᑮᖅᑎᑦᑐᖃᕈᓐᓇᖅᑐᓂ, ᐳᕙᖏᑦ ᐃᒻᒪᒃᓯᒪᓕᕐᓗᑎᑦ, ᐊᒻᒪᓗ ᐃᓅᓴᕋᐃᓗᐊᓲᑦ ᓇᔾᔨᐊᑦ ᐊᒻᒪᓗ/ᐅᕝᕙᓘᓐᓃᑦ ᐅᕿᓗᐊᖅᑐᑎᑦ ᐱᐊᕋᐃᑦ ᐃᓅᓲᑦ.
ᐃᒃᑭᕐᓗᓕᓲᖑᒻᒥᔪᑦ ᐊᐅᒃᑯᑦ ᓱᑲᖃᓗᐊᖃᑦᑕᖅᑐᑦ ᐃᓄᐃᑦ.
ᐱᕙᓪᓕᐊᓲᖑᒻᒪᑦ ᐃᒃᑭᓗᖕᓂᖅ ᖃᓄᖅ?
- ᐱᕙᓪᓕᐊᒍᑎᖃᓕᓲᖅ ᐃᒃᑭᕐᓗᓕᖅᑐᑎᑦ ᖃᓂᑉ ᐃᑭᖏᑦ ᑭᒍᑎᒨᖓᔪᑦ ᐱᐅᒍᓐᓃᖅᑐᑎᑦ. ᐃᑭᖅ ᐳᓪᓕᓲᑦ, ᐋᓐᓂᓲᐊᓲᖑᓪᓗᑎᑦ, ᐊᐅᐸᓕᖅᑐᑎᑦ ᐊᒻᒪᓗ ᐊᐅᓈᓕᖅᓴᕋᐃᑦᑐᑎᑦ. ᖃᓂᒃᑯᑦ ᐃᑭᖏᑦ ᑭᒍᑎᒨᖓᔪᑦ ᐱᐅᒍᓐᓃᖅᓯᒪᒐᓗᐊᖅᑎᓪᓗᒋᑦ ᐱᐅᓯᑎᑕᐅᒍᓐᓇᖅᑐᑦ ᖃᐅᑕᒫᑦ ᑯᒃᑭᓕᑏᔭᖃᑦᑕᕐᓗᑎᑦ ᐃᕙᓘᔭᕐᒥᒃ ᐊᑐᕐᓗᑎᑦ ᐊᒻᒪᓗ ᑭᒍᑎᓯᐅᖃᑦᑕᕐᓗᑎᑦ.
- ᖃᓂᑉ ᐃᑭᖏᑦ ᑭᒍᑎᒨᖓᔪᑦ ᐱᐅᒍᓐᓃᖅᐸᓪᓕᐊᓕᖅᑎᓪᓗᒋᑦ ᑲᒪᒋᔭᐅᙱᒃᑯᓂ, ᖃᓂᖏᓐᓂᑦ ᐃᒃᑭᕐᓗᓕᕈᓐᓇᖅᑐᑦ.
- ᖃᓂᒃᑯᑦ ᐃᒃᑭᕐᓗᑦᑐᑦ ᐱᐅᒍᓐᓃᒃᑲᓂᖅᓯᒪᕗᖅ ᐃᒃᑭᖏᑦ ᑭᒍᑎᒨᖓᔪᑦ ᐱᐅᒍᓐᓃᖅᐸᓪᓕᐊᓚᐅᖅᑎᓪᓗᒋᑦ, ᐃᒃᑭᖅ ᑭᒍᑎᒥ ᐲᖅᐸᓪᓕᐊᓕᓲᖅ. ᓴᐅᓂᖅ ᐊᒻᒪᓗ ᑭᒍᑎᑉ ᐊᑦᑕᑎᖏᑦ ᓴᐅᕐᓂᕐᒨᖓᔪᓂᑦ ᐲᔭᖅᐸᓪᓕᐊᓕᖅᑐᑎᑦ. ᑭᒍᑏᑦ ᐊᐅᓚᓕᕈᓐᓇᖅᑐᑦ, ᐊᒻᒪᓗ ᓅᓪᓗᑎᑦ ᐊᓯᔾᔨᕐᓗᑎᓪᓗ ᐋᖅᑭᒃᓯᒪᓂᖏᑦ.
- ᑲᒪᒋᔭᐅᙱᒃᑯᓂ ᐃᒃᑭᕐᓗᑦᑐᑦ ᑭᒍᑕᐃᕈᓐᓇᖃᑦᑕᓲᑦ.
ᑭᓱᑦ ᖃᓂᑉ ᐃᒃᑭᖏᑦ ᑭᒍᑎᒨᖓᓂᖏᑦ ᐱᐅᒍᓐᓃᕈᑕᐅᓲᖑᒻᒪᑕ?
- ᖃᓂᑉ ᐃᒃᑭᖏᑦ ᑭᒍᑎᒨᖓᓂᖏᑦ ᐱᐅᒍᓐᓃᕈᑕᐅᓲᑦ ᓄᐊᒃᓯᒪᔪᒥᒃ ᖃᓂᐅᑉ ᓱᕈᖅᑐᒥᓂᐅᓂᖓᓂᑦ ᐊᒻᒪᓗ ᖁᐱᕐᕈᖃᓗᐊᓕᖅᑎᓪᓗᒍ ᖃᓂᖅ. ᑖᓐᓇ ᖃᓂᐅᑉ ᓱᕈᕐᓂᖓ ᓂᐱᓐᓈᖅᑐᖅ ᑭᒍᑎᒦᓲᖅ ᑭᒍᑎᓯᐅᖅᑐᖃᖃᑦᑕᙱᒐᐃᒻᒪᑦ. ᖃᓂᐅᑉ ᓱᕈᖅᓯᒪᓂᖏᑦ ᓂᐱᓐᓈᖅᑐᑦ ᖁᐱᕐᕉᕗᑦ ᐱᕈᖅᐸᓪᓕᐊᓲᑦ ᑭᖑᑎᖕᓂᑦ ᖃᐅᑕᒫᑦ.
- ᖃᓂᐅᑉ ᓱᕈᕐᓂᖓ ᓂᐱᓐᓈᖅᑐᑦ ᐲᔭᖅᑕᐅᖃᑦᑕᙱᒐᐃᒻᒪᑕ ᖃᐅᑕᒫᑦ ᑭᒍᑎᓯᐅᕐᓗᑎᑦ ᑯᒃᑭᓕᑏᔭᙱᑦᑐᑎᓪᓗ ᐱᕈᖅᐸᓪᓕᐊᓲᑦ ᑭᒍᑎᒥ. ᑕᐃᒪᐃᑦᑎᓪᓗᒋᑦ ᐃᒃᑭᖅ ᐊᐅᐸᖅᓯᓲᖅ, ᐊᒻᒪᓗ ᐳᓪᓕᖅᑐᓂ ᐊᒻᒪᓗ ᐋᓐᓂᓇᓕᖅᑐᓂ. ᐃᒃᑭᖅ ᐊᐅᓈᓕᖅᓴᕋᐃᓲᖅ, ᐱᓗᐊᖅᑐᒥᒃ ᑭᒍᑎᓯᐅᖅᑐᖃᖅᑎᓪᓗᒍ ᐊᒻᒪᓗ/ᐅᕝᕙᓘᓐᓃᑦ ᑯᒃᑭᓕᑏᔭᖅᑐᖃᖅᑎᓪᓗᒍ.
- ᖃᓂᐅᑉ ᓱᕈᖅᑐᒥᓂᐅᓂᖓ ᑭᒍᑎᒧᑦ ᓂᐱᒃᓯᒪᓲᑦ ᐲᖅᔭᖅᑕᐅᙱᒐᐃᒻᒪᑦ ᑎᓯᑦᑎᓲᖅ ᑭᒍᑏᑦ ᕿᔪᓪᓕᖅᑐᑎᑦ. ᕿᔪᓪᓕᖅᓯᒪᔪᑦ ᑭᒍᑎᒥ ᑕᑯᒃᓴᐅᙱᑦᑐᑎᑦ ᐊᒻᒪᓗ ᐃᒃᑭᑉ ᐃᓗᐊᓃᓲᑦ.
- ᐲᔭᖅᑕᐅᙱᒐᐃᒻᒪᑕ ᑭᒍᑎᐅᑉ ᕿᔪᓪᓕᖅᓯᒪᓂᖓ, “ᖃᓱᓗᐊᓲᑦ” ᐃᒃᑭᖅ ᑭᒍᑎᖃᕐᕕᖓ. ᖃᓂᐅᑉ ᓱᕈᕐᓂᖓ ᓂᐱᓐᓈᖅᑐᖅ ᑭᒍᑎᒦᑦᑐᖅ ᐊᒻᒪᓗ ᐃᒃᑭᖅ ᕿᔪᓪᓕᕐᓂᖓ ᓄᐊᑉᐸᓪᓕᐊᑐᐃᓐᓇᓕᖅᑐᑎᑦ ᑕᐃᑲᓂ ᖃᓱᖓᓗᐊᓕᖅᑐᒥᒃ ᐊᒻᒪᓗ ᑭᓱᕈᓘᔭᕐᓂᑦ ᐃᓗᐊᓅᖅᑐᖃᖃᑦᑕᓕᖅᑐᓂ ᓴᐅᓂᕐᒥᒃ ᓱᕋᐃᔭᐃᓕᖅᑐᓂ ᑭᒍᑎᖃᕐᕕᖓᓂ.
ᖃᓄᖅ ᐃᒃᑭᕐᓗᑦᑕᐃᓕᓕᕈᓐᓇᖅᐳᖓ ᑭᒍᑎᒨᖓᔪᒥᒃ?
- ᖃᓂᐅᑉ ᓱᕈᖅᑐᒥᓂᐅᓂᖓ ᑭᒍᑎᒧᑦ ᓂᐱᓐᓈᖅᑐᑦ ᓂᐱᑎᓯᒪᔪᑦ ᐲᖃᑦᑕᕐᓗᒋᑦ ᖃᐅᑕᒫᑦ:
- ᑭᒍᑎᓯᐅᖃᑦᑕᕐᓗᑎᑦ ᐊᑕᐅᓯᐊᕐᔪᐊᕐᖑᓐᓃᑦ ᖃᐅᑕᒫᑦ; ᓯᓂᒋᐊᖅᑐᓚᐅᙱᓂᕐᓂ ᑭᒍᑎᓯᐅᖃᑦᑕᕐᓗᑎᑦ. ᑕᐃᒪᐃᖁᒥᓇᕋᓗᐊᖅᐳᖅ ᑭᒍᑏᑦ ᑭᒍᑎᓯᐅᖅᑕᐅᖃᑦᑕᕐᓗᑎᑦ ᐅᓪᓗᖅ ᐊᓂᒍᖅᐸᓪᓕᐊᑎᓪᓗᒍ ᐊᕿᑦᑐᓂᑦ ᑭᒍᑎᓯᐅᕈᑎᓂᑦ ᐊᑐᕐᓗᓯ. ᐊᐱᕆᓗᒍ ᑭᒍᑎᓕᕆᔨ ᐃᑲᔪᖅᑕᐅᔪᒪᓗᑎᑦ ᖃᓄᖅ ᑭᒍᑎᓯᐅᑦᑎᐊᖃᑦᑕᑐᒃᓴᐅᒻᒪᖔᖅᐱᑦ.
- ᑯᒃᑭᓕᑏᔭᕐᓗᓂ ᑭᓯᐊᓂ ᐲᔭᐃᒍᓐᓇᕐᒪᑦ ᑭᒍᑎᐅᑉ ᕿᔪᓪᓕᖅᓯᒪᓂᖓᓂᒃ ᐲᔭᐃᒍᓐᓇᕐᒪᑦ ᑭᓯᐊᓂ ᐃᓗᐊᓂ ᖃᓂᑉ ᐃᒃᑭᖓᑕ ᐊᒻᒪᓗ ᑭᒍᑏᑦ ᐊᑯᕐᖓᖏᓐᓃᑦᑐᓂᑦ. ᑭᒍᑎᓯᐅᕈᑏᑦ ᑕᒪᐅᖓ ᑎᑭᑦᑎᒍᓐᓇᙱᒻᒪᑕ.
- ᑭᒍᑎᓯᐅᖃᑦᑕᕐᓗᑎᑦ ᐊᑯᓂᐅᓂᖓᓂᒃ ᖃᐅᔨᓴᕐᓗᑎᑦ: ᑭᒍᑎᓯᐅᑦᑎᐊᕐᕕᒃᓴᐅᒻᒪᑦ ᑭᓯᐊᓂ ᒪᕐᕉᒃ ᒥᓂᔅᓯᒃ ᐊᑯᓂᐅᑎᒋᔪᖅ ᑭᒍᑎᓯᐅᖅᑐᖃᕐᓗᓂ. ᑐᑭᓯᒋᐊᒃᑲᓐᓂᖁᓪᓗᑎᑦ ᖃᓄᖅ ᑭᒍᑎᓯᐅᕈᓐᓇᕐᒪᖔᖅᐱᑦ ᐊᒻᒪᓗ ᑯᒃᑭᓕᑏᔭᕐᓗᑎᑦ, ᐅᕗᖓ ᑕᑯᓂᐊᕐᓗᑎᑦ